logo L'angolo dell'ARTE Alfredo Ossino
Arte

POESIE SICILIANE di Alfredo Ossino

Pinocchio

A GIUSTIZIA

'Nta sta vita, tuttu si pò attruvari
è sulu custioni di soddi p'accattari.

U munnu 'n cummerciu ha divintatu
e l'omu a sta liggi acchiù s'abituatu.

Assai costunu i beddi cosi
e picca chiddi chiù misiriusi.

'Na cosa chiossai vali, chiossai costa
e sta liggi a tutti ci pari giusta.

Puru ju, di sta liggi sugnu cummintu,
ma c'è una cosa, ca mi sballa u ragiunamentu!

'Na cosa, ca certuni gratis vanu vinnennu
e avidi, senza soddi vanu accattannu.

Cu cumanna a prummetti solennementi
e l'avidi ci cridunu comu tanti 'ncuscenti.

E' a giustizia, ca sballa l'opinioni
di cu fa l'analisi di la situazioni.

Eppuru, si rici ca è di valuri, ca è importanti.
Pò essiri ca sugnu ju, ca nun ha caputu nenti?